Ferie

Partenza intelligente
De note xe meo viagiar
Per gaver meno fila
Ma no te se devi indormenzar

Se te parti in setimana
Te pol anca gaver fortuna
Magari xe bela giornada
Magari te rivi prima

Ma se te viagi
per ‘ndartela zercar
Va pur via nel uikend
E dopo no brontolar

Xe de rider vèderli
Dopo gaver carigà i bagagli
I xe za de tuti i colori
I speta dieci chilometri in fila
E dopo i xe rossi come pomidori

Me vignissi de dighe:
“Perché el giorno drio no partì?
Cossa cambia?
Almeno doman xe lunedì”

Sarà sicuro meno confusion
Qualche ora de meno te starà in auto
in corpo meno nervoso te poderà gaver
E te sarà più in voia de zogar

Ma lori niente
Che ferie saria senza coda
Senza la sauna in machina
E co l’autostrada svoda?

E pò cossa te soni?
No te vedi che xe tuto blocà?
El traghetto no scampa
Te son ti l’unico agità

Me par come compreso nel prezo
Per le ferie go speso un capital
E devo farme anche la fila
Cussì sarò sul giornal

E forsi saria un’idea
Che nele offerte
Un sovraprezo le agenzie metessi
E anche zona ora e durata dell’ingorgo
i calcolassi

Che cussì te poderia decider prima
Cossa te va meo far
Se butar soldi in scovaze
O a pie al pedocin andar