Scarpe

Le se movi rasotera

tuto el smog respirando

e le varda tante gambe

chi va pian e chi corendo

Una piada a un balon

e la corda de saltar

de ginastica ghe vol

se te ga de garegiar

Co’ le pedule pe’i monti

e co’ i zocoli d’estate

finalmente sul divano

co’ un bel per de zavate

Eco tante scarpe in mostra

colorade e col taco

per il fredo ‘ssai serade

le spighete per la moda

se le tien tute molade

Se consuma po’ la siola

lore senza brontolar

a un caligher ghe conzemo

che le prova riparar

Solo un caso che le scarpe

se ribela noi ne par

ma chi xe che sta zigando?

e ne manda a ….remengo

Cossa mai sarà sucesso?

per sentir ste brontolade

“ti, lassù… trova una straza!”

che due merde xe pestade