Trestézza marenare - 1965

Gliù trène lasse la stazione,
chigliu dun‐dun che lòtena canzone!
È già brutte partì pe tutte chiglie
che lassene spose, case e figlie,
ma è tante chiù triste assaie
se quande tuorne n'n le saie.

Gliù juorne appriésse  in agenzie, 
prateche de mbarche 'ncapetanerie,
cunségne a bbuorde pe la partènze,
une sbarche e gli'ate che cumènze.

Ncòppe la nave vite de mare
antiche destine de marenare:
uardie, nanòvre e ducumiénte,
careche, scareche, ate mumiénte,
sèmpe, cu tempèste o cu bunacce,
cu mare calme o margiate 'nfacce.

Passene juorne, settemane e mise
tanta trestézze senza maie na rise,
sola speranze uneche cunfuorte
gliù mumènte degli'arrive 'mpuorte
quande finalmente  l'agenzie
pòrte nutizie degli'amoru tije.

Ma a vote, pe na ragione o l'ate,
chélla léttere, pe quante desiate,
n'n arrive e, triste e scunsulate,
te siénte suglie e desperate.

Utema resorse parlà agliù viénte
dumande poche e t'accuntiénte:
"Viénte che vaie, tu che viéne e vaie, 
damme na 'mbasciate de chi saie!
Baste poche, na cosa sole,
na bona nove e me cunsole.
Ma che faie, n'n dice niénte?
N'n sarà maie ca n'n ce siénte?"

Gliù viénte sènte, sènte e comme!
ma tire deritte... e ne responne.